રેખ્તા
હિન્દવી
સૂફીનામા
રાજસ્થાની
સ્મૃતિ
smriti
ગુલામમોહમ્મદ શેખ
ગુલામમોહમ્મદ શેખ
ખાંડના ગાંગડા પર પડેલ પાણીના ટીપાની ઘટ્ટતામાં
મીઠાશ પી પીને મરી ગઈ એક કીડી.
એ જોઈ
મારા મગજની પછવાડે ભરાઈ બેઠેલી
અધકાચી સીમ મારી હથેળીમાં ઊતરી આવી :
આંગળે આંગળે ઊગ્યા આંબા,
પગદંડીઓ પથરાઈ પાંચ દિશામાં.
આંખમાંથી એક પાતળું, મોળું ટીપું નીચે પડ્યું
એને મેં ટાંકણીથી કોચી જોયું.
કીડીઓ કીકીમાં કંટાળીનેય બેસી રહી.
સ્રોત
- પુસ્તક : અથવા અને (પૃષ્ઠ ક્રમાંક 56)
- સર્જક : ગુલામમોહમ્મદ શેખ
- પ્રકાશક : સંવાદ પ્રકાશન અને ક્ષિતિજ સંશોધન પ્રકાશન કેન્દ્ર
- વર્ષ : 2013