રેખ્તા
હિન્દવી
સૂફીનામા
રાજસ્થાની
મારે શું
mare shun
નીતા રામૈયા
નીતા રામૈયા
તમે પીળી પિતાંબરી પહેરીને ઊભા તો ભલે ઊભા
મારે શું
જમુનાની વાટ તમે કાંકરી ઉલાળી બેઠા તો ભલે બેઠા
મારે શું
હું તો મારે નીકળી ગઈ આંખ તીરછી કરીને
એમ મારી મટુકી કોઈ ફોડે ને ઢોળે
એ વાતમાં શું માલ છે
તમે કાનમાં કુંડળ પહેરીને ફરતાં તો ભલે ફરતાં
મારે શું
કદંબની ડાળીએ જઈ તમે વેણુ લઈ બેઠા તો ભલે બેઠા
મારે શું
હું તો મારે જઈ ચડી જમુનાઘાટ ભર્યું બેડે પાણી
ને નીકળી પડી કુંજગલીમાં
એમ કાંઈ મારી કંચૂકીની કસ છૂટે ને તૂટે
એ વાતમાં શું માલ છે
હીરે જડ્યો મુગટ ને ઉપર મોરપિચ્છનું છોગું
ધરીને તમે બાંકે બિહારી રહ્યા તો ભલે રહ્યા
મારે શું
પગની આંટી વાળીને તમે વનમાળી થયા તો ભલે થયા
મારે શું
હું તો મારે કરતી રહી સઘળાં કામ ઘરનાં ને ગામનાં
સાબૂત હતાં મારાં ભાન અને સાન
મારી નથણી ખોવાઈ-બોવાઈ જાય
એ વાતમાં શું માલ છે
એવો રાસ રમવા જાય મારી બલ્લા
સ્રોત
- પુસ્તક : ઉત્તરાયણ (પૃષ્ઠ ક્રમાંક 133)
- સંપાદક : દીપક મહેતા
- પ્રકાશક : નેશનલ બુક ટ્રસ્ટ, ઇન્ડિયા
- વર્ષ : 2008