રેખ્તા
હિન્દવી
સૂફીનામા
રાજસ્થાની
મુક્તિ
mukti
વિપિન પરીખ
વિપિન પરીખ
દવાઓની શીશીઓનો આધાર લઈ ટકી રહેતી જિંદગી નથી ગમતી.
મારાં જ સ્વપ્નાં બિહામણાં કૂતરાંની જેમ મને કરડે નહિ તેથી
ઘેનમાં પડી રહેવું મને ગમતું નથી.
આ પગનાં તળિયાંને લીલા ઘાસની સ્મૃતિ સતાવે છે.
મારી આંખો બેચેન છે–ચોરસ આકાશના બટકાથી એને સંતોષ નથી થતો.
‘આ 10 નંબરનો ગયો–13 નંબર Serious છે,’
મને નથી ગમતી આ ઉદાસ વાતોની અવરજવર.
મને નથી ગમતી ડૉક્ટરોની ઠંડી ઉતાવળ,
સમયની ભૂતાવળ–સફેદ વસ્ત્રોની દોડાદોડી–
આ ક્લૉરોફોર્મની ગંધ–આ ઈથરની વાસ
મને બેહોશ કરે છે આ બિછાનાનો સફેદ કારાવાસ!
મને છૂટો કરો આ હૉસ્પિટલની પીળી ભીંતોથી.
મારે શ્વાસ લેવો છે.
સ્રોત
- પુસ્તક : આશંકા (પૃષ્ઠ ક્રમાંક 92)
- સર્જક : વિપિન પરીખ
- પ્રકાશક : વોરા ઍન્ડ કંપની
- વર્ષ : 1975