રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
અડધી રાતનો ચંદ્ર
aDdhi ratno chandr
મૂકેશ વૈદ્ય
મૂકેશ વૈદ્ય
અડધી રાતનો એકાક્ષી ચંદ્ર
ડોકિયું કરે છે મારા દેહમાં
ને ગળી પડે છે મારાં ગાત્રો.
કંઈ કેટલાય વખતથી
મારી ઊંઘ હરામ કરી
ધોળે દહાડે પણ ચળકી ઊઠ્યો છે એ
આંખના ડોળે તો ક્યારેક કપાળે ટપકતો.
દૂર ક્ષિતિજ ઉપર ઊભો ઊભો
મને એ અચૂક બેઠો કરી દે છે અડધી રાત્રે
માથે આવી અદૃશ્ય થશે-નો ભ્રમ પણ ભાંગી ચૂક્યો છે.
ક્ષીણ ઉજાસનું મીણ
બારીમાંથી રેલાતું અંદર બધે જ બાઝી રહ્યું છે.
બંધ ઓરડામાં એકાકી યાન જેવો
અંધકાર વીંધતો અફળાઉં છું આમથી તેમ.
ને નાની ફાટમાંથી પણ સામે આવી ઊભો રહે છે ચંદ્ર.
હું એને જોઉં કે ન જોઉં
છિદ્ર છિદ્રમાંથી મને સતત તાકે છે એ
પગમાં સીસું થઈ રેડાતો.
ભોંયમાં ઊંડે ઉતારતો
ન ચસતો કે ચસવા દેતો
નિષ્પલક તાકે છે
આ અડધી રાતનો એકાક્ષી ચંદ્ર.
સ્રોત
- પુસ્તક : ગુજરાતી કવિતાચયન 1993 (પૃષ્ઠ ક્રમાંક 37)
- સંપાદક : ચન્દ્રકાન્ત ટોપીવાળા
- પ્રકાશક : ગુજરાતી સાહિત્ય પરિષદ
- વર્ષ : 1995