રેખ્તા
હિન્દવી
સૂફીનામા
રાજસ્થાની
ખેતરમાં વેપારી
khetarman wepari
રઘુવીર ચૌધરી
રઘુવીર ચૌધરી
‘રામ કી ચિડિયા. રામ કા ખેત’ – ગાતા
ખેડુને ભલોભોળો માની
લલચાયો વેપારી – જમીનનો દલાલ.
આ ખેડુ વેચી દેશે ખેતર સસ્તામાં
લાવ, ધરું કોરો ચેક.
‘લો ભગત, લખી દો રકમ ને તમારું નામ’
લખ્યું ખેડુએ, ‘રામ!’
કહે વેપારી : ‘અટક ઉમેરો.’
‘અટક પણ એ જ, રકમ પણ એ જ.’
‘નથી આપવું ખેતર?’
‘લો, આપ્યું, કરો કામ.
પાકે એમાંથી લઈ જાઓ ભાગ
ઓલ્યાં પંખીડાંની જેમ.’
‘મારે ભાગ નહીં, સુવાંગ જોઈએ, ચાંદા સૂરજની સાખે.
માગો એ આપું, ખેતર નહીં માપું.’
‘માણસ પાસે ખેડુ માગે નહીં
મેનત વિના મફતનો લોભ એને જાગે નહીં.
કુદરતનો વારસો લોભિયાને વેચે નહીં.
તમને સમજાય તો સમજો
નકર એટલું યાદ રાખો :
ખેતર કોઈ એકલાને મળતું નથી
સોદાથી એ ફળતું નથી.’
વેપારી અટવાયો.
ખેડુ એની વહારે ધાયો.
સ્રોત
- પુસ્તક : કુદરતની હથેલી (પૃષ્ઠ ક્રમાંક 53)
- સર્જક : રઘુવીર ચૌધરી
- પ્રકાશક : રંગદ્વાર પ્રકાશન
- વર્ષ : 2021