ખેંચાણ

ખેંચાણ

આજકાલ હું

ફૂલને ફૂલ નથી કહેતો

એના શ્વાસનો આકાર કહું છું,

ચંદ્રને ચંદ્ર નથી કહેતો

એના સ્પર્શનો ચમત્કાર કહું છું,

એના કેશને કેશ નથી કહેતો

ત્રીજા નેત્રના ઉઘડેલા પોપચાના પરિણામની

કાળી ધૂમ્રસેરો કહું છું,

એની વાતોમાં, મહાન પ્રેમગીતમાં લપાયેલા

કોઈ કુંવારા અર્થને શોધું છું,

સરોવર જેવા એના શરીર પર

મંદ-મંદ શ્વાસોથી લહેરો બનાવું છું,

છતાં,

છતાં, કોઈ પ્રબળ ખેંચાણ

ખેંચી જાય છે મને

ખખળી ગયેલી ઝૂંપડીના ખૂણામાં પડેલા

ઘાસતેલિયા દીવાની થરથરતી જ્યોત આડે હાથ ધરવા,

બાળોતિયા વગરની નિર્દોષતાને

હૂંફ આપવા,

ઠંડા પડી ગયેલા લોહીને

શબ્દોના લાવાથી ગરમ કરવા

ને તરત પછી

સામે એની

બની જાઉં છું હું ઠંડું પડી ગયેલું શરીર

આજકાલ હું, ઠંડું પડી ગયેલું શરીર પણ બની જાઉં છું.

khenchan