રેખ્તા
હિન્દવી
સૂફીનામા
રાજસ્થાની
કવિનો પુનર્જન્મ
kawino punarjanm
મણિલાલ દેસાઈ
મણિલાલ દેસાઈ
આ સૂર્યને કો શાંત પાડો
ને ચંદ્રને કોઈ ડુબાવો અંધકારે,
તારલા પર કોઈ તો દ્યો ફેરવી
મેશનો કાળો પીછો.
ને તો ય...
ને તો ય આ ધરતી ઝગે, ગ્રહ ટમટમે
તો એને ય દાટી દ્યો.
આજે
મારે (અરે, મારે જ શા માટે? બધાએ બધાએ)
અંધકાર માણવો છે.
પ્રસવ પહેલાં મા તણા ઉદરે રહી
જે ભોગવ્યો
ને જ્યાં થકી
આ હૃદય ધબકાર લાવ્યું, ગીત લાવ્યું,
આંખ જ્યાં શીખી ટમકવું.
તે સૌ ભુલાયું.
બુઝાવી દ્યો, બુઝાવો, બુઝાવો,
આજે ફરી આ સૃષ્ટિ પર
મારે, કવિએ જન્મવું છે.
સ્રોત
- પુસ્તક : રાનેરી (પૃષ્ઠ ક્રમાંક 20)
- સર્જક : મણિલાલ દેસાઈ
- પ્રકાશક : ગૂર્જર ગ્રંથરત્ન કાર્યાલય
- વર્ષ : 1987
- આવૃત્તિ : 2