રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

દ્રોહ

યોગેશ વૈદ્ય

દ્રોહ

યોગેશ વૈદ્ય

Roman

મેં

એક આગિયાને

મારા ખોબામાં સાચવીને રાખી લીધો

કે તરત જ

જાગી ગયેલું અંધારું

ઘૂરકવા લાગ્યું

મારી સામે.

પહેલી વખત

મેં રેતીને બદલે

પાક્કા પથ્થરની દીવાલ બનાવી

ઉઘાડી-વાસી શકાય તેવી

બારીઓ મૂકી તેમાં

બસ એ જ ક્ષણે

હવા સાથે

દુશ્મની વહોરી લીધી મેં

સામેના કાંઠે જઈને

કોઈને મળવું

એ ગુનો તો નથી ને?

મેં નદીના બન્ને કાંઠાઓને જોડતો

પુલ બનાવ્યો

ખબર નહીં શું ખોટું કર્યું!

પણ તે દિવસથી

આ નદી

મારાથી રિસાયેલી રિસાયેલી રહે છે.

બસ એમ જ

મેં આ નાનકડી કવિતા લખી છે

પણ

હું જોઈ રહ્યો છું

ક્રોધિત કાળનો હાથ

થરથર કાંપી રહ્યો છે.

સ્રોત

પુસ્તક : ભટ્ટખડકી (પૃષ્ઠ ક્રમાંક 48)
સર્જક : યોગેશ વૈદ્ય
પ્રકાશક : ઝેન ઓપસ
વર્ષ : 2023