રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

મારી કવિતા

સાહિલ પરમાર

મારી કવિતા

સાહિલ પરમાર

Roman

મારી કવિતા

એનાં ગંદાં વસ્ત્રોમાં

મારા જેવી જ કંગાળ

હજી યે ઝંખે છે સ્વીકૃતિ

મૅગેઝીનનાં રેશમી ચીકણાં

પાનાંઓની

હજી ય વાંકદેખી દૃષ્ટિએ જોવાયેલી

આંખ આડા પડળથી

હજી યે અદીઠ

સંભળાયા વિનાની

પડી છે અર્ધચેત

મારી કવિતા

મારા જેવી ગામઠી

ઊભી છે

ઇન્ડિયન લિટરેચરના

ઉંબરે

હજી યે

અન્ય પરિધાન માટે

પ્રતિબંધિત

મારા આક્રોશમય

ચહેરા જેવી

તાંબાળી લાલ

ઊભી છે દૂર

એકલી

બહિષ્કૃત

મારી કવિતા

મારા જેવી જ ગાંડીઘેલી

રખડે છે ચાલીમાં,

મહોલ્લામાં અને ચોરાહા પર

અને ગંદી ચાલીઓમાં

દૂરના ઉવેખાયેલ

અણવિકસિત ગામડા જેવી

નોકરશાહ બાબુ સંસ્કૃતિથી

ઉવેખાયેલ મારી કવિતા

મારી કવિતા

મારી જીભ જેવી જ

અસભ્ય

અને મારા જેવી જ

અસ્પૃશ્ય

સભ્ય, સુસંસ્કૃત

સાફસુથરા વિવેચકો દ્વારા

મૂકી દેવાયેલી બાજુ પર

ભુલાયેલી

તરછોડાયેલી

મારી કવિતા

સ્રોત

પુસ્તક : મથામણ (પૃષ્ઠ ક્રમાંક 13)
સર્જક : સાહિલ પરમાર
પ્રકાશક : પોતે
વર્ષ : 2004