રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

હું, બળદ, ને કવિતા

ભરત ત્રિવેદી

હું, બળદ, ને કવિતા

ભરત ત્રિવેદી

Roman

આજકાલ હું કવિતા લખવા બેસું ત્યારે

એક સફેદ બળદ

મારી આંખ સામે આવી ઉભો રહી જાય છે

તેનાં શિંગડાં

લાલ અને ભૂરા રંગથી રંગેલા છે

કદાચ તેના વજનથી જ

ડોક નમાવીને ઉભો છે

તેની ગ્રીવા મખમલની રજાઈ જેમ

લટકી રહી છે

તેની આંખોમાં

સો વીઘા જમીન ખેડયાનો

થાક વર્તાઈ રહ્યો છે

મારે કવિતા તો લખવી હતી

આકાશમાં ઉડતા પંખીઓ વિષે,

માર્ગમાં આવતા નદી નાળાં ને પર્વતો વિષે

વાદળોમાં સંતાઈ બેઠેલા

શ્રાવણના આછાતરા વરસાદ વિષે, પણ

આ લાલભૂરા શિંગડાવાળો બળદ

વચ્ચે નડે છે.

કવિ છું એટલે તેની કાન પટ્ટી પકડીને

તેને હું દૂર ખેંચી જઈ

પાછો ફરી નવી કવિતા માંડી શકતો નથી

કવિએ જ્યારે લાલ - ભૂરા રંગે ચીતરાયેલ

બળદ સામે બેસીને કવિતા કરવાની હોય ત્યારે

લાંબી ધીરજની જરૂર હોય છે.

સ્રોત

પુસ્તક : એતદ્
વર્ષ : 2002