હમણાં હમણાંથી આવું થાય છે

ટીકુની સ્કૂલબૅગમાં વોટરબોટલ મૂકવાની રહી જાય છે

ને એ યાદ આવે

ઉતાવળે ગૅસ ઉપર કૂકર ચડાવતાં

અપરાધવૃત્તિનો તૂરો સ્વાદ જીભ ઉપર

ફરી વળે એ પેલા

અદરખ-તુલસીવાળી ચાનો સબડકો

સિસકારો

જીભ દાઝી કે બીજું કંઈ?

ગળામાં કંઈક અટવાયું - ઊંડો નિસાસો

ડૂમાનો ચિત્કાર

પતિની બૂમ કાન સોંસરવી

'સૉરી, હોં દૂધીના શાકમાં અજમો નહીં નાખું

હવેથી ધ્યાન રાખીશ, કાલે તો જરા'

પતિ દ્વારા બારણું બંધ,

ધ...ડા...મ

ઊંડો ધ્રાસકો - પગમાં ગતિ

વચમાં જ અરે, ઉફ!

મશીનમાં નાખવાના કપડાં પગમાં વીંટળાયાં

રંગીન કપડાંને અલગ કરવાની તમા કર્યા વગર જ;

મશીનમાં કપડાં અવળાં-સવળાં વીંટળાયાં

અને મનમાં વિચારો

નકામી કાળજી રાખી રાખીને અળગી રહી

એ વખતે

જ્યારે સાંગોપાંગ રંગાઈ જવાનું હતું

એ હેબતાઈ ગઈ મશીન ઉપર ભીંતે ચોડેલા

અરીસામાં જોઈને

આ ચહેરો પોતાનો છે?

હડબડતા આત્મવિશ્વાસે જરાક થથરી આ આંખો

અંધારિયા કૂવા જેવી

કોણ બોલેલું : ગોખલાના દીવા જેવી

અત્યારે પણ અજવાળાં જેવું હસવા તો ગઈ

પણ મનમાં ઘૂઘવતા

હવડ કૂવાના ઘોર અંધકારે

આંખો આંજી દીધી

છાતીનું પારેવું ફફડી ઊઠ્યું

ને લાગલું જ

રંગ, ગંધ, સ્વાદ, ધ્વનિ અને સ્પર્શની પેલે પારની એ ક્ષણે

સમજણનાં સરનામાં જેવું

આત્મીય અજવાળાં જેવું

એક નામ યાદ આવી જાય છે

હા, હમણાં હમણાંથી આવું થાય છે.