રેખ્તા
હિન્દવી
સૂફીનામા
રાજસ્થાની
આવો
aawo
માધવ રામાનુજ
માધવ રામાનુજ
ઘરે આવો પાછા, સમજણ લઈને સફરની
ઘરે પાછા આવો ગમગીન બનીને સફરને
ન લંબાવો! પંથે ક્ષિતિજ ઢળતી જોઈ સતત
અને સંભારીને સતત નમતી વેળ...અટકે!
ન શું ફોરી ઊઠે ઘર, ફડિયું ને ગામ શમણે?
વસેલાં હૈયાની નિકટ ધૂળિયા પંથ સીમના,
અને માળે બાંધ્યા કલરવ ભર્યું ખેતર ઊડે
નહીં શ્વાસે શ્વાસે-સ્મરણ બનીને? પંથ તમને
કદીયે ના ચીંધે નીરવ રવનું ગાન નભનું :
અહીં શેઢે બેસી નિત નીરખતાં જે ભળકડે?
વળી સંધ્યાટાણે ધણ રણકતું ઝાલર સમું
વળે ખીલે પાછું...વિવશ ન કરે કોઈ તમને?
આવો ત્યારે કહીશ નહિ આવો, પધારો અતિથિ!
—ઊભી હું તો અગણિત યુગોથી અહીં રાહ જોતી!
સ્રોત
- પુસ્તક : તમે (પૃષ્ઠ ક્રમાંક 65)
- સર્જક : માધવ રામાનુજ
- પ્રકાશક : આર. આર. શેઠની કંપની
- વર્ષ : 1986
- આવૃત્તિ : બીજી આવૃત્તિ