ગાય

ગાય

તેત્રીસ કરોડ દેવતાઓનો ભાર વેંઢારતી

વસુકેલી ગાય

શહેરની શેરીઓમાં ગૌચર શોધે

અહીં ક્યાંય ગૌચર કે વીડી નથી

એવી પ્રતીતિ છતાં છાપાં ચાવે

પેટમાં ખૂંપી ન જાય છાપાંની કટારો

એટલે વાગોળે

ખાધું હોય એ કરતાં વધારે.

ચાવતાં શીખી ત્યારથી છાપાં પચાવી જાણે ગાય

એંઠવાડ રસપૂર્વક પી જાય

પેટમાં સંગોપી રાખે પ્લાસ્ટિકની કોથળીઓ

મૃત્યુ સુધી.

ગાયને આજ સુધી કોઈએ દેખાડી જ નથી

ઘાસની લીલોતરી

તો પણ ગાયને સુખ એ વાતનું કે -

ક્યારેય મીણો ચઢતો નથી

આફરો ચઢતો નથી

છતાં નીતરતી આંખે

ભૂખાળવી નજરે

નિમાણી થઈ ચાવતી રહે છાપાં.

Gaay