રેખ્તા
હિન્દવી
સૂફીનામા
રાજસ્થાની
પ્રતિબદ્ધ
pratibaddh
હિમાંશુ વ્હોરા
હિમાંશુ વ્હોરા
હે ખુલ્લી જગાઓ
તમે મને સતાવો નહીં
હું ફેક્ટરી નાખવાનો વિચાર કરું છું
ઓ હરિયાળાં જંગલો
મને લલચાવો નહીં
મારે તમારાં લાકડાંનું કામ છે
હે આકાશનાં વાદળો
મને આકર્ષો નહીં
મારે ધુમાડો છોડવો છે
હે સુરીલાં વહેણો
મને મોહિત કરો નહીં
મારે તમને બંધમાં બાંધવાં છે
હે લીલાછમ ડુંગરો
મને લોભાવો નહીં
મારે તમને વીંધી નાખવા છે
હે કુદરતના પ્રેમીઓ
મને ચળાવો નહીં
હું પ્રગતિ કરવા પ્રતિબદ્ધ છું
સ્રોત
- પુસ્તક : આપણી કવિતાસમૃદ્ધિ (ઉત્તરાર્ધ) (પૃષ્ઠ ક્રમાંક 365)
- સંપાદક : ચન્દ્રકાન્ત ટોપીવાળા
- પ્રકાશક : ગુજરાતી સાહિત્ય પરિષદ
- વર્ષ : 2004