દિવસો પછી માણેલી એક સવાર

આ

ગાયોના આંચળમાંથી બોઘરણામાં છંટાતી દૂધની સેરનાં સ્રોતો!

આ

ખેતરમાં દોડવા અધીર બળદોને કંઠે રણકતી ઘૂઘરીઓના પ્રભાતિયાં

આ

સવારનું કપૂરી અજવાળું!

આ

શીતળ સમીરનો માદક ધૂપ!

આ

સૂડાઓના સ-સ્વર વૈદિક મંત્રોચ્ચાર!

આ

ગૂપચૂપ ટૂટિયુંવાળી આવી બેઠેલા સોનવર્ણી સૂરજદેવ!

આ

ભટુરિયાઓના ભમરડાઓના ગુંજારવની ધૂન!

આ

સદ્યસ્નાતાના હર્યાભર્યા લાલિત્યની દીપશિખા!

જાણે વર્ષો પછી

હું

મારા ઘરની હૂંફ માણી રહ્યો છું

Divso Pachhi maneli Ek Savar