માટી ન ઊકલી

માટી ન ઊકલી

અનંત અગાધમાં ઊતર્યાં

સૂર્યતારાનક્ષત્ર આકાશગંગાનાં નામઠામ પાડ્યાં

વીણ્યાં ને ગણ્યાં એ બધાં

સરવરમાં સજાવ્યાં

સૌ પાણી પારખ્યાં

વાયુ વલોવ્યા

અંગારવાયુનાં માખણ કીધાં

ભરમ ખોલ્યા

ભરમાંડ ગાયાં

કાળાં બાકોરાંનાં જલમમરણ વાંચ્યાં

એક વેળા માટી અને આકાશ એક હતાં

ઉફરા ગયેલા આકાશને ભજ્યું

હવે આકાશને જ ગાઈ સંભળાવીએ

આકાશબાપા,

અમને

એક આ

ધરતીની શેર માટી ન ઊકલી

mati na ukli