રેખ્તા
હિન્દવી
સૂફીનામા
રાજસ્થાની
ડાઘ
Dagh
મધુકાન્ત કલ્પિત
મધુકાન્ત કલ્પિત
કાળા ન્હોર
અને
તીક્ષ્ણ ચાંચ વડે
મને ચૂંથે છે સભાનતા
કોઠે પડેલું
ઉપેક્ષાનું જળ
ગટ્ ગટ્
પેટમાં
ધુબાક્ દઈ એવું વાગે કે
મારી હયાતીનો જીર્ણશીર્ણ પડદો
હલી ઊઠે સળંગ.
હિલ્લોળાવા માંડે
અમાનવીય વ્યવહારના ભારે રોલર નીચે
ચગદાઈ ગયેલા
મારા દારુણ ઇતિહાસનો વિકૃત ચહેરો.
ચેતના પર અંકિત
એ ડાઘ
હું જેમ ભૂંસવા મથું
એમ એમ
મંજાઈને
વધુ ઝગારા મારી ઊઠે!
સ્રોત
- પુસ્તક : તરજુમો (પૃષ્ઠ ક્રમાંક 10)
- સર્જક : મધુકાન્ત કલ્પિત
- પ્રકાશક : પોતે
- વર્ષ : 2008