રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
વિપિન પરીખ
રવિવારનું છાપું હાથમાં આવે કે તરત પહેલાં જોઈ લઉં છું :
ધનુરાશિ માટે આવતું સપ્તાહ શું શું લાવે છે.
જાણું છું, થોડાક વારોનાં નામની આમતેમ ફેરબદલી હશે!
ગયા અઠવાડિયે ગુરુ તો આ અઠવાડિયે શુક્રવાર શુભ હશે.
“તા. 19મીએ અચાનક ધનલાભનો યોગ સારો છે.”
છેલ્લાં ત્રણ વરસથી આ વાંચી વાંચીને જ લૉટરી લેતો આવ્યો છું.
આપેલી તારીખોમાંથી એકે ફળી નથી.
છતાં એકાદ chance એવી પણ જાય!
કહે છે : કોઈ મધુર સમાગમનો આ અઠવાડિયે યોગ છે.
હસવું આવે છે–
બે છોકરાંનો બાપ અને માથે ટાલ,
અને હવે આકર્ષણ–પરિચય
તોપણ સારું લાગે છે.
થોડાંક સ્વપ્નો....જુઠ્ઠાં હોય તોપણ
લખે છે : “તમારા ઉપર ઘેરાયેલાં વાદળ વીખરાતાં જશે.”
જાણું છું :
આકાશમાં કોઈ પણ વાદળ હંમેશ માટે ક્યારેય ટકતું નથી.
છતાં જુઠ્ઠાં વાક્યોનો વરતારો પણ થોડોક આધાર તો આપે જ છે!
શનિવારની સાંજે અઠવાડિયાનું સરવૈયું કાઢતાં ક્રોધથી બોલી પડાય છે :
‘સાલાઓ તદ્દન જુઠ્ઠા છે....એક શબ્દ પણ સાચો પડતો નથી!’
છતાં
આવતા રવિવારે વ્હેલી સવારે મારી નજર સૌ પ્રથમ
આ જ પાના ઉપર બિલાડીની જેમ તૂટી પડશે–
એ પણ જાણું છું!
સ્રોત
- પુસ્તક : તલાશ (પૃષ્ઠ ક્રમાંક 22)
- સર્જક : વિપિન પરીખ
- પ્રકાશક : એન. એમ. ત્રિપાઠી પ્રાઇવેટ લિમિટેડ
- વર્ષ : 1980