રેખ્તા
હિન્દવી
સૂફીનામા
રાજસ્થાની
ચારણકન્યા
charankanyaa
પ્રતિષ્ઠા પંડ્યા
પ્રતિષ્ઠા પંડ્યા
કોઈ તમને તૈયાર કરતું નથી
મોં ફાડીને તમારી સામે ઊભા રહી જતા
જંગલી વાઘનો સામનો કરવા.
તમને નથી આપેલાં હોતાં
કોઈ મશાલ, કોઈ ભાલો, કોઈ બંદૂક
ધીમાધીમા ને નિશ્ચિત
તમારી તરફ વધતાં એ પગલાંઓને
તમારા શ્વાસની જેમ અધ્ધર રોકતાં
કોઈ શીખવતું નથી
તમારી આંખની કીકીઓ એના પંજા પર..
લોખંડી ખીલાની જેમ જડી દઈ
એને આગળ વધતાં ડરાવતાંય
તમને કોઈ શીખવતું નથી
એની ત્રાડને ભરી શ્વાસમાં
થથરતી હિંમત ભરીને હાડમાં
એને લલકારતાં તમને કોઈ શીખવતું નથી
અંધારામાં તમે તગતગતી
બે પીળી આંખોનાં અજવાળાંમાં
ખોળતા રહો છો ચારણકન્યાની
કોઈ બેબાકળી લાકડી
ને થઈ જાઓ છો લીરેલીરા
ત્યાં પેટ ભરાઈ જતાં
લોહી નીગળતા શિકારની જેમ
તમને રસ્તા વચ્ચે છોડીને
ચાલ્યા જાય છે એ પ્રશ્નો
ત્યારે એ અધમૂઆ શરીરને
ઉપાડી ફરી એક વાર
બાકીનું જંગલ કેમ પાર કરવું
તમને કોઈ શીખવતું નથી.
સ્રોત
- પુસ્તક : નરસંહારના સમયમાં પ્રેમ (પૃષ્ઠ ક્રમાંક 49)
- સર્જક : પ્રતિષ્ઠા પંડ્યા
- પ્રકાશક : ઝેન ઓપસ
- વર્ષ : 2025