રેખ્તા
હિન્દવી
સૂફીનામા
રાજસ્થાની
ભીમની ઉક્તિ
bhimni ukti
રઘુવીર ચૌધરી
રઘુવીર ચૌધરી
સહદેવ, અગ્નિ લાવ
જે હાથે દ્રૌપદીને હોડમાં મૂકી
એ હાથ હું બાળી નાખું.
ભલે એ હોય મોટાભાઈના.
જાતને હારનાર
બીજાને હોડમાં મૂકે એ મને મંજૂર નથી.
સહદેવ, અગ્નિ લાવ,
હું આ આખી દ્યુતસભાને સળગાવી દઉં.
આ સિંહાસન પર સ્થિર થયેલા અંધાપાને
પ્રકાશમાં પલટાવી દઉં.
પાંચાલીના પ્રશ્નનો ઉત્તર કોઈની પાસે નથી.
અહીં આશ્રિત બનેલો ધર્મ
અંધાપાને અનુકૂળ વર્તી રહ્યો છે.
શાંતિના નામે હું દાસ નથી રહેવાનો.
હું અધર્મની છાતી તોડીશ.
સહદેવ, તારું સત્ય લાવ,
એને હું મારા બળમાં પ્રગટાવીશ.
સ્રોત
- પુસ્તક : વહેતાં વૃક્ષ પવનમાં (પૃષ્ઠ ક્રમાંક 31)
- સર્જક : રઘુવીર ચૌધરી
- પ્રકાશક : રંગદ્વાર પ્રકાશન
- વર્ષ : 1984