સ્વીચ ઑફ થતાં

સ્વીચ ઑફ થતાં

સ્વીચ ઑફ થાય

ઓરડામાં અંધકારનું રીંછ

બારીમાંથી ધસી આવી ભરાય,

ત્યારે

મારી બે કાળવી કીકીનાં પતંગિયાં

એ જ માર્ગે

ઊડી જાય દૂર... દૂર...

પ્રિયે-

તારાં શ્યામલ મસૃણ કેશરાશિમાંથી

સુગંધની જીહ્વા

હળુ હળુ ચાટે છે મારા રક્તને-

મારા ચિત્તમાં ઝૂલી જાય લાલ લાલ કેસૂડાં!

એ તગતગે એવાં

જાણે પેલા રીંછનું રક્તડાઘ્યું મોં!

એમાંથી કઈ રીતે બચાવું હું તને?

એમાંથી કઈ રીતે બચાવું હું મને?

તું અને હું તો

અગ્નિથી અલગ પડેલી ફડફડતી જ્વાળાઓ છીએ.

ક્યાં જવું?

ક્યાં ટકવું?

એની દિશા મળે એ પ્હેલા તો

હું અને તું મૃત્યુ પામીએ છીએ

સ્વીચ ઑફ થતાં-

Switch Off Thata