રેખ્તા
હિન્દવી
સૂફીનામા
રાજસ્થાની
દ્રોહ
droh
યોગેશ વૈદ્ય
યોગેશ વૈદ્ય
મેં
એક આગિયાને
મારા ખોબામાં સાચવીને રાખી લીધો
કે તરત જ
જાગી ગયેલું અંધારું
ઘૂરકવા લાગ્યું
મારી સામે.
પહેલી વખત
મેં રેતીને બદલે
પાક્કા પથ્થરની દીવાલ બનાવી
ઉઘાડી-વાસી શકાય તેવી
બારીઓ મૂકી તેમાં
બસ એ જ ક્ષણે
હવા સાથે
દુશ્મની વહોરી લીધી મેં
સામેના કાંઠે જઈને
કોઈને મળવું
એ ગુનો તો નથી ને?
મેં નદીના બન્ને કાંઠાઓને જોડતો
પુલ બનાવ્યો
ખબર નહીં શું ખોટું કર્યું!
પણ તે દિવસથી
આ નદી
મારાથી રિસાયેલી રિસાયેલી રહે છે.
બસ એમ જ
મેં આ નાનકડી કવિતા લખી છે
પણ
હું જોઈ રહ્યો છું
ક્રોધિત કાળનો હાથ
થરથર કાંપી રહ્યો છે.
સ્રોત
- પુસ્તક : ભટ્ટખડકી (પૃષ્ઠ ક્રમાંક 48)
- સર્જક : યોગેશ વૈદ્ય
- પ્રકાશક : ઝેન ઓપસ
- વર્ષ : 2023