રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

અગ્નિદાહ

પ્રતિષ્ઠા પંડ્યા

પ્રતિષ્ઠા પંડ્યા

અગ્નિદાહ

પ્રતિષ્ઠા પંડ્યા

Roman

મોઢે બુકાની બાંધેલો

એ માણસ

અવારનવાર

ઈલેક્ટ્રિકની ભઠ્ઠીનું

ઢાંકણું ખોલી

કઢાઈમાં ધાણીની જેમ

હલાવે છે પપ્પાના શરીરને

હમણાં છેલ્લે હલાવ્યું

ત્યારે સળગતી, લાવા જેવી

જ્વાળાઓની વચમાં દેખાઈ’તી

પપ્પાની કરોડરજ્જુ

ને એની સાથે હજુય

જોડાયેલી ખોપરી

બહાર આવી વીંટળાઈ ગઈ’તી સજ્જડ

એમના બળતા શરીરની વાસ

સ્મશાનથી પાછા આવી

માથું ઘસી નહાઈ

હવે શરીર મહેકે છે

વાળમાં ચોંટેલી

સ્મશાનની રાખ

ગટરમાં વહી ગઈ હશે

સુંવાળા, હજૂય નીતરતા વાળ અને

સુગંધિત, સ્વચ્છ વસ્ત્રોમાં સજ્જ મને

લાકડાના ખાટલા પર સુવાડી

હવે દાહ દેવાય છે...

મોં પર બુકાની બાંધેલા

આ જલ્લાદને હું ઓળખતી નથી

નથી ઓળખતી આ આગને

જેમાં એ આમથી તેમ

હડસેલે તો છે મારું શરીર

પણ પપ્પાના શરીરની જેમ

આ શરીર ભસ્મ થયું જ નથી!

મૃત્યુ

સ્રોત

પુસ્તક : ળળળ... (પૃષ્ઠ ક્રમાંક 24)
સર્જક : પ્રતિષ્ઠા પંડ્યા
પ્રકાશક : નવજીવન સાંપ્રત
વર્ષ : 2019