અઘરું, નચિકેતા થવાનું

આમ

ઉંબર સુધી આવીને પાછા ફરવાનું!

ગમતું તો નથી; પણ શું થાય?

સજ્જડ ઝાલ્યો મને

આ વેલીએ, આ હરણાએ

આ તરણાએ, આ ઝરણાએ

જીવનાશ્રમની સકલ વ્હાલપે, કરુણાએ

ખેંચી રાખ્યો સખત મને પાછળથી.

કોઈ બોલ્યું નહિ વિદાયવચનો - આશીર્વાદ;

અરે તિરસ્કારનો એક બોલ

એક હડસેલોય પૂરતો થાત.

હવે

આમ ઉંબર સુધી આવીને પાછા ફરવાનું!

ખરેખર, કેટલું અઘરું છે નચિકેતા થવાનું!

aghrun, nachiketaa thavaanun