એ લોકો

દાબડીમાં દળેલી ખાંડ ભરી

શોધતાં હતાં કીડીઓનાં ઠેકાણાં

અગાસીમાં નાંખતા બાજરીના દાણા

જેથી ચકલાં આવીને ચણે

તેઓ ઘર બહાર બનાવતાં

પાણીની કૂંડી

જેથી આવતાં-જતાં તરસ્યાં પ્રાણી પી શકે પાણી

જમ્યાં પૂર્વે

તેઓ અલગ કરતાં ગાય તથા અન્ય પ્રાણીઓનો ભાગ

સંધ્યાકાળ પછી, તે ચૂંટવા ન દેતા

વૃક્ષનું એક પણ પર્ણ

જેથી વિક્ષેપ ન પડે

સૂતેલાં તરુવરોની નિદ્રામાં

તેઓ સામેથી જ કરતાં વાતનો પ્રારંભ

અજાણ્યાંની પૂછી લેતાં ઓળખાણ

અભ્યાગતની કરતાં હતાં

મન મૂકીને મદદ

કોઈ શોધે કોઈનું ઘર

તો જાતે જ દોરી જતાં એ સરનામે

કોઈ દિશાહીન અપરિચિત પથિક

આવી પડે મધરાતે

તો કરતાં ખાવા-સૂવાની ગોઠવણ

શક્ય છે, દૂર-સુદૂર કોઈ ગામ કે પરામાં

રડ્યાં-ખડ્યાં હોય એ નસલના લોકો

કદાચ એવાં લોકોનું

સ્થાપવામાં આવે સ્મૃતિભવન

જેથી આવનારી પેઢીઓના લોકો

જાણી શકે

જીવવાની આ પણ એક હતી ઢબ.

(અનુ. કિશન ચાવડા)