આભડછેટ એટલે શું

આભડછેટ એટલે શું

મેં મોરને પૂછ્યું : આભડછેટ એટલે શું?

તો મોર તો થનગન થનગન કરી નાચવા લાગ્યો

ને મારે ગાલે મજાની કિસ કરી ટહુકા કરવા લાગ્યો!

મેં વૃક્ષને પૂછ્યું : આભડછેટ એટલે શું?

તો એણે તો ડાળીઓ નમાવી મને કાખમાં જ બેસાડી દીધો!

મેં ફૂલને પૂછ્યું : આભડછેટ એટલે શું?

તો એ તો બધી સોડમ વિખેરતું મારા નાક સાથે ગેલ

કરવા લાગ્યું!

મેં નદીને પૂછ્યું : આભડછેટ એટલે શું?

તો એ તો મારા પગને સ્પર્શીને છેક

મારા હૃદય સુધી મને ભીનો કરી ગઈ!

મેં પથ્થરદિલ પહાડને પૂછ્યું : આભડછેટ એટલે શું?

એ તો પીગળીને રેલો થઈ વહેવા લાગ્યો મારી પૂંઠે પૂંઠે,

મને અડવા-આભડવા જ તો!

મેં માણસને પૂછ્યું : આભડછેટ એટલે શું?

મારી સામે જોયું,

દૂર ખસ્યો ને

ચાલવા લાગ્યો.

abhaDchhet etle shun