રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
મેહુલ દેવકલા
લિસ્સા દૂધિયા
ગોળાકાર
આદિમ પથ્થરો
વાતાનુકૂલિત રેસ્ટોરન્ટની
આ લિસ્સી બારસાખ પર
ખાસ્સી લાંબી સફરના
અંતે આવ્યા હશે
પપ્પા બોલ્યા –
મહીના વિશાળ પટમાં
આવા જ પથ્થરોથી
રમતા અમે
સંધ્યાટાણે
વીજળી જતાં
આંબા નીચે
આ જ ચકમક પથ્થરોથી
ચમકાવેલા તણખા
હવે તો લગભગ ભુલાયેલા એ ભેરુઓની
આંખે જોયાનું –
મને પણ કૈંક યાદ આવ્યું
સહજીવનની શરૂઆતના
એ પ્રથમ પ્રવાસે
અંતરિયાળ
નોર્બુલિંગકા મોનેસ્ટ્રીના
રમણીય ઉદ્યાનમાં ભાળ્યા હતા
આ જ પથ્થરો
અજાણી કોઈ લિપિ કોતરેલા
એક પર એક ગોઠવાયેલા
શ્વસી રહ્યા હતા
ૐ મણિ પદ્મે હું...
આ જ પથ્થરોથી
પહેલવહેલાં માનવોએ
પ્રગટાવ્યો હશે અગ્નિ
ગુફાઓનાં અંધારામાં
ને ભાળ્યો હશે
જંગલી જનાવરોની આંખોમાં
આદિમ માનવો
ને
આદિમ અગ્નિ
કરતાં પણ
આદિમ છે આ પથ્થરો
સ્રોત
- પુસ્તક : સર્જનની ક્ષણે (પૃષ્ઠ ક્રમાંક 9)
- સર્જક : મેહુલ દેવકલા
- પ્રકાશક : ગુજરાત સાહિત્ય અકાદમી
- વર્ષ : 2019