સ્વસ્તિ શ્રી પુરી લંકા સોહામણી, જ્યાં રાજે છે જનકકુમારી;

પ્રીતમ લખે પ્યારીને.

રહો અખંડ એવાતણ તમતણું, એવી આશીષ વાંચો અમારી. પ્રીતમ...

ગોરી દૈવના જોગે જુદાં પડ્યાં, પણ પ્રાણ મારા તુજ પાસ;

બેસું બાગ બગીચે કે બંગલે, રહું તમ વિના અધિક ઉદાસ. પ્રી...

તારો સ્નેહ ઘડીએ ઘડી સાંભરે, તારો ભાવ ભુલ્યો કેમ જાય;

તારા હેતથી હૈડું ભરાય છે, તે તો લેખણથી ન લખાય; પ્રી...

મારે અર્થે તમે બાળાપણ થકી, તજ્યો સઘળો પીયર પરિવાર;

મારાં લેશ વચન નથી લોપીઆં, નથી કોપીઆં કદીયે લગાર. પ્રી...

તારી નમ્રતા અમ્રતથી ગળી, વળી શોભીતો શાંત સ્વભાવ;

જેથી મનની ઉદાસી તરત મટે, તારા બોલનો એવો બનાવ. પ્રી...

ગોરાદે તારા ગુણ કેમ વીસરે, કેમ વીસરે વાલપ ભર્યાં વેણ;

હેતે હસતું વદન તારું વિનતા, મારાં નિરખવા તલખે છે નેણ. પ્રી...

દિવસે તુજ વિના દીલમાં ગોઠે નહીં, પીવું પાણી કે જમવું અનાજ;

રાતે રોઈ રોઈ આંખો રાતી થઈ, લોક પૂછે તો આવે લાજ. પ્રી...

ગોરી મનમાં ધીરજ ધરી રાખવી, કાલે ભાગશે ભવના વિજોગ;

જેથી રીઝે આપણને જગતપતિ, એવો અહોનિશ કરવો ઉદ્યોગ. પ્રી...

જે જે વ્રધ પાડોશીયો શુદ્ધ છે, તેને પ્રીતથી કહેજો પ્રણામ;

વિભીષણ મારા મિત્ર પવિત્રને, કહેજો જરૂરનું હોય જો કામ. પ્રી...

જોઈતી વસ્તુ જરૂર મંગાવજો, કશી વાતે મુઝાશો ન મંન;

કાલે દેખીશું દિવસ આનંદના, જાશે વીસરી આ દુખભર્યા દંન. પ્રી...

જે જે પ્યારી તમારી સાહેલીયો, તેને પણ મારા કહેજો જુહાર;

સાસુ સસરાની આશીષે સુંદરી, મળશું ભામની ને ભરતાર પ્રી...

વધે સ્નેહ ને સંપ સુજન સાથે, તેવી તનમન રાખજો ટેવ;

અમે થોડી અવધે હવે આવશું, એમ દલપતરામનો દેવ; પ્રીતમ...