પપ્પા સંગીતમાં દાદા છે!

તાનસેનથી પણ જ્યાદા છે

પપ્પા, સંગીતમાં દાદા છે!

ધુમ્મક ધૂમ, ધુમ્મક ધૂમ

લલકારે છે લઈને વાજું

ગીત સુરીલું, તાજું માજું

સૂર સાંભળો લીસા-લીસા

સા-રે-ગ-મ-પ-ધ-નિ-સા

ધુમ્મક ધૂમ, ધુમ્મક ધૂમ

મારા પપ્પા રોજ પરોઢે

ગાતા પંખીઓની જોડે

સુબહ-સુબહ હું આંખો ખોલું

‘સુબહાનલ્લા’ – જોરથી બોલું

ધુમ્મક ધૂમ, ધુમ્મક ધૂમ

મને કહે કે આવો બબલા

લાવો પેટી, પાવો, તબલાં

હું તો ફક્ત ચડાવી બાંયો

ઝીંકે રાખું બાંયો-દાંયો

ધુમ્મક ધૂમ- ધુમ્મક ધૂમ

નાદિર દીન્તા નીતા નારે

તિરકિટ ધુમ, તન્ની તાથા રે...

ઐયૈયો, આ તબલાંઓ તો

કેવું મદ્રાસી ગાતા રે!

ધુમ્મક ધૂમ, ધુમ્મક ધૂમ

અવાજના ઊજળા આરસથી

પપ્પા તાજમહાલ બનાવે

હું તો ઔરંગઝેબ, મને તો

માત્ર આટલું સમજમાં આવે :

ધુમ્મક ધૂમ, ધુમ્મક ધૂમ

pappa sangitnaa dada chhe