મસ્તીમોજ

મસ્તીમોજ

ઝાડ પર બેસી કાગડાભાઈ

તો બોલ્યા કરતા કા કા કા,

રસોડામાંથી બા બોલી ત્યાં

અલ્યા! ઊડ તું જા, જા જા.

ચકલીબાઈ તો દાણા ચણતાં

બોલ્યાં કરતાં ચીં ચીં ચીં,

ખાટે બેસી છીંકણી સૂંઘતાં

દાદી છીંક્યાં હાક છીં, છીં.

આંગણામાં ચણતાં પારેવાં

બોલ્યાં કરતાં ઘૂ ઘૂ ઘૂ,

ઓટલે બેસી પાન ચાવતાં

દાદા કરતાં હાક થૂ થૂ.

ધૂળમાં રમતા કૂકડાભાઈ

તો બોલ્યા કરતા કૂક રે કૂક,

નાની મારી ગાડી લઈને

રમતો હું તો છુક છુક છુક.

કાગડો, કૂકડો, કબૂતર, ચકલી

આંગણે મારે આવે રોજ,

ચાળા પાડી સહુના નકલી

કરતો હું તો મસ્તીમોજ.

mastiimoj