રેખ્તા
હિન્દવી
સૂફીનામા
રાજસ્થાની
ઝવેરચંદ મેઘાણી
નાના થૈને, નાના થૈને, નાના થૈને રે
બાપુ! તમે નાના થૈને રે
મારા જેવા નાના થૈને રે
છાનામાના રમવા આવો! નાના થૈને રે.
નાના કેવી રીતે થાવું
આવો, બાપુ! રીત બતાવું
ઢીંકા, પાટુ, પીવું, ખાવું
પાડા થઈને રે. -નાના.
શેરી વચ્ચે નાચવા આવો
ઓળકોળાંબે હીંચવા આવો.
બોથડ મોટી મૂછ બોડાવો
પૈસો દેને રે. -નાના.
સૂરજ ભૈની નાનકી છોડી
કૂરડિયે કંકુડાં ઘોળી
દા’ડી દા’ડી આવે દોડી
દરિયે થૈને રે. -નાના.
ડુંગર ઉપર જઈ બોલાવો
ઉષા બેની, આવો આવો!
એની પાસે ગાલ રંગાવો
ગોઠ્યણ થૈને રે. -નાના.
નાને માથે નાનકડી પાંથી
દૈશ ઓળી મીંડલાં ગૂંથી
જોજો રાતે નાખતા ચૂંથી
ગાંડા થૈને રે. -નાના.
ઝભ્ભે ઝાઝાં રાખજો ખીસાં
માંહી પાંચીકા વીણશું લીસા
કાગળ, બાગળ, રૂપિયા પૈસા
ફેંકી દૈને રે. -નાના.
ખેંચી દોરી ખૂબ હીંચોળે
થાકેલી બા જાશે ઝોલે
ભાગી જાશું બેઉ ભાગોળે
સાંકળ દૈને રે. -નાના.
વેળુ વચ્ચે વીરડા ગાળી
વાંકે ઘૂંટણ પીશું પાણી
ગોવાળ આવે ગાડર જાણી
ડાંગો લૈને રે. -નાના.
લીંબોડીના લૂમખા લેવા
ઝૂલશું ઝાડે વાંદર જેવાં
પંખીડલાંના ખાશું મેવા
જંગલ જૈને રે. -નાના.
ખેતર કોતર ખીણ ઓળંગી
જોઇ વાદળીઓ રંગબેરંગી
ઘૂમશું ડુંગર જંગી જંગી
ઘેલાં થૈને રે. -નાના.
નાની આંખે નાનકાં આંસુ
બાની સાથે રોજ રીસાશું
ખાંતે એના ધબ્બા ખાશું
ખોળે જૈને રે. -નાના.
નાના થૈને, નાના થૈને, નાના થૈને રે!
(1932)
સ્રોત
- પુસ્તક : સોના નાવડી (પૃષ્ઠ ક્રમાંક 239)
- સંપાદક : જયંત મેઘાણી
- પ્રકાશક : ગુજરાત સાહિત્ય અકાદમી
- વર્ષ : 1997