મેઘધનુષ પર જાવું છે

મેઘધનુષ પર જાવું છે

આભ નહીં સંભાળી શકશે

કારણ કે એ ભોળું છે,

વરસાદ છે કે તોફાન કરતા

છોકરાંઓનું ટોળું છે!

શાંત સરોવર પર લખાતું

છાંટાનું જોડકણું છે,

છબાક છબ છબ કરતું કેવું

ખાબોચિયું બોલકણું છે!

પહેલાં તો ચૂપચાપ બધા

આખો ઉનાળો રઝળે છે,

પછીથી વૃક્ષો, ઘર ને રસ્તા

મન મૂકીને પલળે છે!

નેવાંથી પડતાં ટીપાનું

નાનકડું ગીત ગાવું છે,

પાણીની સીડીથી મારે

મેઘધનુષ પર જાવું છે!

આવે વખતે ચોપડીઓમાં

ક્યાં મોં ઘાલી રહેવું છે,

એકબીજાને મળી અને

“વરસાદ મુબારક” કહેવું છે!

meghdhanush par jaavun chhe