રેખ્તા
હિન્દવી
સૂફીનામા
રાજસ્થાની
ટરરર ટરરર ઢમ ઢમ ઢમ
કરો રમકડાં કૂચકદમ!
હાથીભાઈ ચાલે આગળ
પીછે ઊંટ સવારી;
ખડાક ખડદડ ઘોડા દોડે
દેખો અજબ ખુમારી;
સૌના રક્ષક સૈનિક હમ
કરો રમકડાં કૂચકદમ!
ઉપર ઘરરર વિમાન ગરજે
નીચે લશ્કર-ગાડી;
ભરી બંદૂકે બંદા સાથે
ચાલે હાકલ પાડી :
'હોશિયાર'નો કરું હુકમ
કરો રમકડાં કૂચકદમ!
બા તો હોઠે ધરે આંગળી
બાપા અચરજ પામે;
મોટાભાઈ પૂછે ચડાઈ
કરી કહો કયા ગામે?
કહો ખુદાના ખાઈ કસમ
કરો રમકડાં કૂચકદમ!
ટેબલ ઉપર ચડી ગૌરવે
બંદા કાઢી છાતી
કહે હિંદના રક્ષણ કાજે
સેના કાશ્મીર જાતી :
હસનારાને થતી શરમ
કરો રમકડાં કૂચકદમ!
ટરરર ટરરર ઢમ ઢમ ઢમ
કરો રમકડાં કૂચકદમ!
સ્રોત
- પુસ્તક : ઝબૂક વીજળી ઝબૂક - ભાગ ૧ (પૃષ્ઠ ક્રમાંક 19)
- સર્જક : મકરન્દ દવે
- પ્રકાશક : નવભારત સાહિત્ય મંદિર
- વર્ષ : 1991
- આવૃત્તિ : પુનર્મુદ્રણ