રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
ચાંદરણું
chandaranun
કાન્તિ કડિયા
કાન્તિ કડિયા
રમતું રમતું આવ્યું રે ઝલમલ ઝલમલ ચાંદરણું,
અંગ બધું ચમકાવ્યું રે ઝલમલ ઝલમલ ચાંદરણું.
બારીની તડમાંથી આવ્યું
પાદરના વડમાંથી આવ્યું
ઝળહળ ઝભલું લાવ્યું રે ઝલમલ ઝલમલ ચાંદરણું,
રમતું રમતું આવ્યું રે ઝલમલ ઝલમલ ચાંદરણું.
પાણીથી મેં મોઢું ધોયું
ચમકીને પાણીમાં જોયું
ન્હાવા માટે આવ્યું રે ઝલમલ ઝલમલ ચાંદરણું,
રમતું રમતું આવ્યું રે ઝલમલ ઝલમલ ચાંદરણું.
થાળીમાં તો મૂકી પૂરી
વાટકડીમાં ખીર મધુરી
જમવા માટે આવ્યું રે ઝલમલ ઝલમલ ચાંદરણું,
રમતું રમતું આવ્યું રે ઝલમલ ઝલમલ ચાંદરણું.
ઘરને ઓટે કરી પથારી
કરવા વાતો સારી સારી
લીમડે લસરી આવ્યું રે ઝલમલ ઝલમલ ચાંદરણું,
રમતું રમતું આવ્યું રે ઝલમલ ઝલમલ ચાંદરણું.
સ્રોત
- પુસ્તક : મઘમઘાટ (પૃષ્ઠ ક્રમાંક 47)
- સંપાદક : કનૈયાલાલ જોશી, કાન્તિ કડિયા
- પ્રકાશક : હાર્દિક પ્રકાશન
- વર્ષ : 1982