રેખ્તા
હિન્દવી
સૂફીનામા
રાજસ્થાની
ચાડિયો
chaDiyo
મોહન ઠક્કર
મોહન ઠક્કર
ખેતરની વચમાં ઊભો હું ચાડિયો,
રખોપાં રાત-દી કરતો જી રે!
કડકડતી ટાઢ હો, બળતા બપોર હો,
મે’ની ઝડીમાં ય ઠરતો જી રે! —ખેતરની...
આવે પરોઢિયું ને વાઘા આ મારા
મોંઘાં મોતીડે સજાવે જી રે!
વીંઝાતો વાયરો આવે અદેખો,
મોંઘાં એ મોતી ટાળે જી રે! —ખેતરની...
આવે ચોમાસું ને સૂતાં ખેતરને
પાણી છાંટી એ જગાડે જી રે!
ધાને લચંત મોલ લીલાં લહેરિયાં,
બંદા સૌ ચોરને ભગાડે જી રે! —ખેતરની...
ખેતરની વચમાં ઊભો હું ચાડિયો,
રખોપાં રાત-દી કરતો જી રે!
સાંઠીકડાંની કાય વાઘે સજીને,
ખેતરની ‘આલબેલ’ ભરતો જી રે! —ખેતરની...
સ્રોત
- પુસ્તક : ગીતરાણી (પૃષ્ઠ ક્રમાંક 48)
- સંપાદક : ભાનુભાઈ પંડ્યા
- પ્રકાશક : ઘરશાળા પ્રકાશનમંદિર
- વર્ષ : 1945