રેખ્તા
હિન્દવી
સૂફીનામા
રાજસ્થાની
સુરગંગાનો દીવડો
surgangano diwDo
બાલમુકુન્દ દવે
બાલમુકુન્દ દવે
કંચનકાયા ઘડેલું એક કોડિયું રે,
કે જલતું આદિ તે કાલથી અખંડ;
દીવડો સુરગંગાથી ઊતર્યો રે.
દીવડામાં તેલ પૂર્યાં ત્રણ ગુણનાં રે,
કે દીવડાની વાટ પડી વરમંડ;
દીવડો સુરગંગાથી ઊતર્યો રે.
દીવડો ભીંજે ના હો જલધારથી રે,
કે દીવડો ડોલે ના વાયરે લગાર;
દીવડો સુરગંગાથી ઊતર્યો રે.
દીવડાને ફરતા કિરણના કેવડા રે,
કે અનહદ ભમરાના ગુંજાર;
દીવડો સુરગંગાથી ઊતર્યો રે.
સૂરજ, ચંદર ને નવલખ તારલા રે,
કે દીવડાનો એ તો આછો ઉન્મેષ;
દીવડો સુરગંગાથી ઊતર્યો રે.
દીવડો દાનેશરી ચૌદ લોકનો રે,
કે દીવડાનો તોયે ફકીરી વેશ;
દીવડો સુરગંગાથી ઊતર્યો રે
(૧૯પ૦)
સ્રોત
- પુસ્તક : પરિક્રમા (પૃષ્ઠ ક્રમાંક 97)
- સર્જક : બાલમુકુન્દ દવે
- પ્રકાશક : વોરા એન્ડ કંપની
- વર્ષ : 1991
- આવૃત્તિ : પુનર્મુદ્રણ