રેખ્તા
હિન્દવી
સૂફીનામા
રાજસ્થાની
બાવાજી, તમારાં હશે તે તમને ભજશે
એને આંચ નૈ આવે લગાર
એ પરબુંના પીર !
બાંહોડલી ઝાલ્યાની ખાવંદ લાજ છે.
બાવાજી, નવસો નવાણું ચીર પૂરિયાં
ધ્રુપતી દાસી તમારી કરી જાણો !
પરબુંના પીર — બાંહોડલી૦
પ્રેહલાદ કારણ તમે પ્રગટિયા.
હરણાકંસનો કર્યો રે સંહાર
પરબુંના પીર.— બાંહોડલી૦
સૂઈને રિયાં શું સુખપાલમાં?
તમે જાણી ન જોયું લગાર
પરબુંના પીર — બાંહોડલી૦
કાળિંગો આવ્યો અતપાતનો.
રખે લોપે અમારી લાજ
પરબુંના પીર. — બાંહોડલી૦
ઝટક દઈને ચડજો ઘોડલે,
શેલી શીંગી પીર શાદલને હાથ
પરબુંના પીર — બાંહોડલી૦
ઘોડે ઘોડે શંખ વાગશે,
તમારાં ઝબક્યાં લીલુડાં નિશાન
પરબુંના પીર. — બાંહોડલી૦
ગરવા દેવાંગી પરતાપે અમર બોલિયાં
તારા સેવકુંને ચરણુંમાં રાખ
પરબુંના પીર. — બાંહોડલી૦
સ્રોત
- પુસ્તક : પુરાતન જ્યોત (પૃષ્ઠ ક્રમાંક 111)
- સર્જક : ઝવેરચંદ મેઘાણી
- પ્રકાશક : પ્રસાર, ભાવનગર
- વર્ષ : 1962