શાને કરે છે વિલાપ, કાયારાણી ! શાને કરે છે વિલાપ રે,

તારે ને મારે હવે કાંઈ નથી, કાયારાણી રે, એમ જીવરાજા કહે છે જી...

ઘણા દિવસનો ઘરવાસ આપણે, ઘણા દિવસનો ઘરવાસ રે,

મૂકી ન જાવ મુંને એકલી, જીવરાજા ! રે, એમ કાયારાણી કહે છે જી...

મમતા મેલી દે ને માંયલી, અંતરથી છોડી દે ને આશ રે,

રજા નથી મારા રામની, જીવરાજા ! રે, એમ કાયારાણી કહે છે જી...

અઘોર વનની માંય કાયારાણી ! અઘોર વનની માંય રે,

મૂકી ન જાવ મુંને એકલી, જીવરાજા ! રે, એમ કાયારાણી કહે છે જી...

શાને કરે છે વિલાપ, કાયારાણી ! શાને કરે છે વિલાપ રે,

ઓચિંતાનાં મુકામ આવિયા, કાયારાણી રે, એમ જીવરાજા કહે છે જી…

ક્યારે થશે મેળાપ, આપણો, ક્યારે થશે રે મેળાપ રે,

વચન દઈને સિધાવજો, જીવરાજા ! રે, એમ કાયારાણી કહે છે જી...

હતી ભાડુતી વ્હેલ કાયારાણી ! હતી ભાડુતી વ્હેલ રે,

લેણ-દેણના સંબંધ છે, કાયારાણી ! રે, એમ જીવરાજા કહે છે જી...

નથી દૂર મુકામ, આપણો, નથી દૂર મુકામ રે,

મને આટલે પહોંચાડી સિધાવજો, જીવરાજા ! રે, એમ કાયારાણી કહે છે જી...

છેલ્લા હવે રામ રામ, કાયારાણી ! છેલ્લા હવે રામ રામ રે,

જાવું ધણીના દરબારમાં, કાયારાણી ! રે, એમ જીવરાજા કહે છે જી...

પુરુષોત્તમના સ્વામી શામળા, ભક્તો તણા રખવાળ ३,

સાચાં સગાં છે ઈ તો સરવના, કાયારાણી ! રે એમ જીવરાજા કહે છે જી...