સતગુરુ મહારાજ

સતગુરુ મહારાજ

સતગુરુ મહારાજ, પૂરણ પ્રેમ દયાલની મૂર્તિ છો તમે,

અવગુણ મ્હારા, કોટી છે પણ એકે ધરશો ન હૈયે.

મ્હારા અવગુણના ભંડાર ભર્યા,

મ્હારા વિકાર તો ના જાય કહ્યા;

તમો કિરપાનાથે નથી લહ્યા. સતગુરુ૦

મ્હારે લોભ તૃષ્ણા ઈર્ષ્યા ઘણી,

પ્રપંચ અવિદ્યા માંહી ભરી;

મ્હારે અહં-ગ્રંથિ તો નથી ગળી. સતગુરુ૦

હું તો અનેક વાર ચોરાશી ફરી,

મોહનિદ્રા આશાપાશ(માં) પડી;

હવે આવી સ્વામી તમ ભણી. સતગુરુ૦

મ્હારે મન બુધ ચિત્ત સ્થિર નથી,

રાખી ચરણને કરો સત મતિ;

મ્હારે કહેવું હતું તે કહ્યું કથી. સતગુરુ૦

પરમારથ બુદ્ધિ તમારી, ‘જતુ’ને લેજો ઉગારી,

છું ચરણરજ હું દાસી. સતગુરુ૦

Satguru maharaj