સખી મહાપદ કેરી વાત, કોઈક જાણે રે,

જેને સતગુરુ મિલિયા સાર, સોહી પિછાણે.

સખી નાભિકમલ ઘટ માંહી, સોહમ ઊઠે રે

તિયાં જાપ જપે છે હંસ, તાર ન તૂટે રે. - સખી૦

સખી ઇંગલા પિંગલા સાર, સુખમના નાડી રે

તિયાં ચંદ્ર સૂરજ મળી બે, કે મનછાને મારી રે. - સખી૦

સખી ત્રિવેણી ઘરની માંહી, કે અખંડ જોતિ રે

તિયાં ઝગમગ ઝગમગ થાયે, કે વરસે મોતી રે. - સખી૦

સખી બંકનાળ મુકામ, સાચો કહીએ રે,

તિયાં નુરત સુરત મળી બે, કે પરચો લહીએ રે. - સખી૦

સખી એટલા સરવે નિશાન, મેલે એ નીચાં રે,

ભાઈ તેથી ઊંચે રે દેશ, કે ચડવાં ઊંચાં રે. - સખી૦

સખી પાંચ કોસ પર ગામ કે, નિશાનધારી રે,

તિયાં ધરી સુરતાનુ ધ્યાન, શ્વાસો મારી રે. - સખી૦

સખી સઘળાં રોમેરોમ, કે લાગ્યા જપવા રે,

ત્યારે સઘળા ઘટના ચોર કે, લાગ્યા છીપવા રે. - સખી૦

સખી પિંડ તણી ખબર કે, સઘળી વીસરી રે,

જ્યારે સુરતી ચડી ભરમંડ, ફૂટી નીકળી રે. - સખી૦

સખી અરસ પરસ ના કોટ, જોયા નિરખી રે

એવા સાત દ્વીપ નવ ખંડ, જોયા, પરખી રે. - સખી૦

સખી વેદ કિતાબ માંહી, કે એ ગમ નાંહી રે,

તિયાં નહીં દિવસ નહીં રાત, કે ધૂપ નહીં છાંઈ રે. - સખી૦

સખી કેવા સરીખો નથી, કે મારો સ્વામિ રે,

એ તો જોયા સરીખો છે, અલખ અનામી રે. - સખી૦

સખી અલખ અનામી સાહેબ, લાગ્યા મીઠા રે,

ભણે 'પીર સદરૂદ્દીન' શ્યામ, મેં નજરે દીઠા રે. - સખી૦