સગપણ આડાં આવે, એના મનડાને બહુ મૂંઝાવે,

યુદ્ધમાં અર્જુનને રે, એનાં સગપણ આડાં આવે..૦

કુરુક્ષેત્રમાં કૃષ્ણ પ્રભુજી, મધ્યમાં રથને લાવે,

કોને મારું? ક્યાં તીર ચલાવું? એની સમજણમાં નવ આવે...

- યુદ્ધમાં અર્જુનને રે, એનાં સગપણ આડાં આવે...૦

અરજુન કહે, મારા કૃષ્ણ પ્રભુજી ! આ પાપથી કોણ બચાવે?

રુધિર ભરેલા વૈભવ એ તો મુંને, કેમ ભોગવવા ભાવે ?

- યુદ્ધમાં અર્જુનને રે, એનાં સગપણ આડાં આવે...૦

કોઈ સગું નથી આ દુનિયામાં, એમ શ્યામ સુંદર સમજાવે,

આવી કાયરતા ભાઈ! ક્યાંથી લાવ્યો ? તારી કીર્તિને કલંક લગાવે...

- યુદ્ધમાં અર્જુનને રે, એનાં સગપણ આડાં આવે…૦

અગ્નિ ન બાળે, એને પવન ન સૂકવે, પાણી એને ન પલાળે,

આતમ તત્ત્વ અમર છે અર્જુન ! જ્ઞાન ગીતા સમજાવે…

- યુદ્ધમાં અર્જુનને રે, એનાં સગપણ આડાં આવે...૦

જ્ઞાન ગીતામાં ધ્યાન દઈને, ઓલો અર્જુન બાણ ચલાવે,

પરસોત્તમના સ્વામી શામળો, એ તો ભારતમાં ભારત રચાવે…

- યુદ્ધમાં અર્જુનને રે, એનાં સગપણ આડાં આવે...૦