રાવણ કહે રે; ‘મંદોદરી, હારશો નહિ હૈયે;

લંકાગઢ કેમ લેવાશે, દશરથને રે છૈયે? રાવણ૦

સેના એની જુઓ શોભતી, માંહી વનચર વારુ;

રાજા રાવણને જીતશે, એ તો શ બળ સારુ? રાવણ૦

થાળી વગાડે હું નવ બીઉં, રહ્યા ત્રંબાળુ ગાજી;

મુજ આગળ શો આશરો? શીદ જક કરે છે ઝાઝી? રાવણ૦

અજાણ્યો મારો એ નથી, માનુની મતિ પાઈ;

જોર કરીને આવિયો, જો જનકનો જમાઈ ! રાવણ૦

ત્રણ ભુવનમાં તરુણી, નથી નરપતિ એવા;

રાજા રાવણ-શું આથડે, યુદ્ધનો લહાવો લેવા. રાવણ૦

નવ ગ્રહને મેં વશ કર્યાં, લોપી મુનિવરની માઝા;

ઇંદ્ર રહ્યો મુજ આજ્ઞા મહીં, તેત્રીશ ક્રોડનો રાજા. રાવણ૦

મરણ આવ્યું હશે મારું, હરિને હાથે હણાશું;

લંકા લેઈ વૈકુંઠ આ૫શે, તેમાં લાતી શો ખોશું. રાવણ૦

નાર નહિ આપું એ રામને, બિરદ મારું રે જાય;

થનાર હશે તે થઈ રે'શે !’ ગુણ ‘રણછોડ’ ગાય. રાવણ૦