[દુહો]

નંદજી કેહે : 'ઉદ્ધવ ! સુણો, માહારા મનની વાત :

મેં હઇડું ક્ષણ થિર કર્યું; પણ મરશે એની માત.

એક મહુરતમાં માહાવજી લીલા કીધી લક્ષ;

ઘટે નહીં ગોવ્યંદજી ! તજવો તેહેનો પક્ષ.

[ગીત]

આવોજી એક વાર, આતા ! આવોજી એક વાર;

દિન દશ રહીને ચાલજ્યોજી, પ્રાણ તણા આધાર !... આતા૦

નાહાનો સરખો નેશડો રે, કાલા ગેહેલા લોક;

તે ગોકુલ આવો, કાહાનજી રે ! તેહનો ટાલવાનો શોક… આતા૦

શોણું સરખું વહી ગયું રે; ખરી ન પોહોતી ખાંત;

સુખદુ:ખ કેરી વાતડી રે, નવ્ય કીધી એકાંત... આતા૦

ભાર ઉતારો, ભૂધરા રે ! ગરઢો જાણીને તાત;

કોહોને દુઃખ મનનું કેહે રે, મોહન ! તાહારી માત?... આતા૦

જો મથુરામાં વસવું ગમે રે, તો તેડો અમને સાથ;

ના નવ્ય કહિએ, કાહાનજી ! ઝાલી જાતાં હાથ્ય... આતા૦

સરવ વિના જ્યવિ સરે રે, ન સરે તુજ વિના, વીર !

કોહોની કહી વિધ રાખીએ રે, પ્રાણ વિનાનાં શરીર ?... આતા૦

મન જોયાને મોકલ્યા રે, ઉદ્ધવ, માહારાં તંન !

પણ હીરે જે જન હેલવ્યા રે, તેહેનાં સ્ફટિકે ન માને મંન... આતા૦

એહ પચવીશી પ્રેમની રે, ગાશે સુણશે જેહ,

જ્યાની, જ્યદુપતિ રાખશે રે, તે જન ઊપર નેહ... આતા૦