નથી એકે ઘડીનો નિરધાર

તારા માથે નગારાં વાગે મોતનાં રે,

નથી એકે ઘડીનો નિરધાર ! તો ય જાણ્યા નહિ જગદીશને રે.

મોટા મેલીને રાજ મરી ગયા રે, જોને જાતાં ન લાગી વાર ! તો ય૦

તારું જોબન ગયું જખ મારતું રે, માથે કાળા મટી ગયા કેશ ! તો ય૦

અંતકાળે લેવાને જમ આવિયા રે, તેનો ભાળી ભયંકર વેશ ! તો ય૦

રોમે કોટિ વીંછી તણી વેદના રે, દુઃખ પામ્યો તું દૈવના ચોર! તો ય૦

સગાં સ્વાર્થી મળ્યાં સહુ લૂંટવા રે, તેમાં જરી યે ન ચાલે જોર! તો ય૦

જીભ ટૂંકી પડી ને તૂટી નાડીઓ રે, થયું દેહ તજ્યાનું તત્કાળ ! તો ય૦

‘દેવાનંદ’ કહે ન જાણ્યા નાથને રે, મળ્યો માણસનો દેહ વિશાળ. તો ય૦

Nathi eke ghadno nirdhar