રહો મારી મીટલડીમાં માવા !

નહિ દઉં તમને રે હો જાવા.

પ્રીત લગાડી શાને પહેલી?

હવે ક્યાં જાઓ છો રે હો મેલી? રહો૦

અમને ભોજનિયાં નહિ ભાવે,

નયને નિંદ્રા રે હો ના’વે. રહો૦

સુખડાં શામળિયાનાં સાલે,

વ્યાકુળ કીધાં રે હો વહાલે. રહો૦

પલક ન મેલું મારા પ્રિયતમ તમને,

વહાલા લાગો રે હો અમને. રહો૦

વીસરી વાત હરિને વ્રજની,

સનમુખ રમતા રે હો રજની. રહો૦

રાસ–મંડળમાં ભેળાં રમતાં,

એણી પરે હરિને રે હો ગમતાં. રહો૦

સુંદર વર અવિનાશી પામી,

દાસ ‘વિહારી’ના રે હો સ્વામી ! રહો૦