ના વિસારીએ રૂડા હૃદયમાંથી રામ

ના વિસારીએ રૂડા હૃદયમાંથી રામ.

હરતાં જઈએ, ફરતાં જઈ, કરીએ ઘરનું કામ;

હરિગુણ ગાતાં જીભલડી! તુંને શું બેસે છે દામ? ના વિ૦

પગ આપ્યા તીરથ કરવા, હાથ સેવા કરવા શ્યામ;

નયન આપ્યાં પ્રભુ નીરખવા, કીરતન સાંભળવા કાન. ના વિ૦

હું તુંને વારું જીભલડી, તું મેલ્યને આળપંપાળ;

એક દિન એનો આવશે, જે માતા વછોડે બાળ. ના વિ૦

માનવનો અવતાર ફરી ફરી, નહિ મળે મન માન;

આવ્યા તેવા ચાલતા થાશો, મૂકી માન ગુમાન. ના વિ૦

‘કેશવ’ કહે સાંભળ પ્રાણી, કહેવું મારું માન;

અડધે વચને આપ્યું છે, ગજ ગુણિકાને વૈમાન. ના વિ૦

Na visarie ruda harday mathi