મારા જદુપતિ જાદવા રે

મારા જદુપતિ જાદવા રે વિનંતી સુણોને વિશ્વાધાર,

શરણ તમારે હું છું શામળા રે તો વા'લા કેમ નહિ કરો વાર

મારા જદુપતિ જાદવા રે...

સભા સહુ દેખતાં હાર આપીએ રે બરદ પાળોને પોતાનું શ્યામ,

સહાય સેવકની કીજીએ રે મહેતાજીને મનમાં પૂરો હામ.

મારા જદુપતિ જાદવા રે...

ગોકુળમાં તેં ગિરધારી રક્ષા કરીને ગોપીઓને ઘણાં લડાવ્યાં લાડ

તેમ મહેતાજીની આશા પૂરો રે અબળા માનું તમારો રે પાડ.

મારા જદુપતિ જાદવા રે...

જગમાં જનમીને રે, અમો ભૂલાં પડ્યાં રે તારી ભક્તિએ પામ્યાં ઠામ

બાંહ્ય ગ્રહ્યાની ફરજ તાહરી રે અમે પ્રીત કરી તમશું સુંદર શ્યામ.

મારા જદુપતિ જાદવા રે...

તમારે જગતમાં ભક્તો અનેક છે રે અમારે તો એક તમે ભગવાન

'રતનીબાઈ' કહે છે રે, પ્રભુ ! પધારીએ રે વહાલા હાર આપીને રાખો માન.

મારા જદુપતિ જાદવા રે...

Mara jadupati jadava re