કોઈ શોધી લાવે મારા નાથને

કોઈ શોધ લાવે મારા નાથને, તેને નવનિધ આપું;

મોતીડે વધાવું તેહને, કષ્ટ કોડેથી કાપું !

સખી કોઈ સમજાવીને, ઘેર તેડી રે લાવે;

કઠણ હૈયાના કાનજી, સંદેશો ન કહાવે ! કોઈ૦

કોઈ ગુણવંતી ગોરડી, પ્રીતમજીને પૂછે;

શા માટે રિસાઈ ગયા? તેનું કારણ શું છે? કોઈ૦

મુજને મૂકીને જોગી થયા, કે કોઈએ ભરમાવ્યા?

કોને ભરોસે મૂકી ગયા? હજુ ઘેર ન આવ્યા. કોઈ૦

કાંઈ સમજણ પડતી નથી, રહું નિત્ય ઉદાસી;

વસમું લાગે મુંને વિઠ્ઠલા, મથુરાના રે વાસી. કોઈ૦

અનેક અપરાધ ક્ષમા કીજીએ, કહું છું શિર નામી;

વા’લમાં વે'લા આવજો, ‘રણછાડ’ના સ્વામી ! કોઈ૦

Koi Sodhi lave mara nath ne