કિયા રે પુરુષે વાવ્યાં આંબલિયાનાં બીજ

કિયા રે પુરુષે વાવ્યાં આંબલિયાનાં બીજ,

કિયા રે પુરુષ આંબો રોપિયો રે જી...

રાવત રણશી લાવ્યો આંબલિયાનાં બીજ,

ખીમડિયે કોટવાળે આંબો રોપિયો રે જી...

મંગાવ્યા મંગાવ્યા કવલી તે ગાયનાં દૂધ,

ઈ દૂધે રે આંબલિયાને સીંચિયો રે જી...

ઈ રે આંબાની પાળ્યું ગિયું છે પિયાળ,

ચોરાશી જોજનમાં આંબો સાંચર્યો રે જી...

ઈ રે આંબલિયાને રૂપલા વરણાં છે પાન,

સોનલા સરીખી શાખું લાગિયું રે જી...

મંગાવો મંગાવો નુરત સુરતના દોર,

ઈ દોરેથી આંબલિયાને વેડીએ રે જી...

કિયા રે પુરુષે વાવી આંબલિયાની ડાળ્ય,

કિયા રે પુરુષે આંબો વેડિયો રે જી...

પરથમ કેરી ગઈ ગઢ આબુ ને ગિરનાર,

બીજી કેરી રે સિંગલદ્વીપમાં રે જી...

ત્રીજી કેરી ગઈ દેવ તણે દુવાર,

ચોથી કેરી ગતગંગામાં તો વાવરી રે જી...

બોલ્યા બોલ્યા 'ખીમડિયો કોટવાળ'

મારા સાધુડા અમરાપરમાં માલશે રે જી...

kiya re purushe wawyan ambaliyanan beej