રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
ખુદ માલિકે ખેલ બનાવ્યો
khud malike khel banawyo
અંબારામ ભગત
અંબારામ ભગત
ખુદ માલિકે ખેલ બનાવ્યો, ખોજો રે તમે ખંતથી !
જીવ નહિ, ઈશ્વર નહિ, અને નહિ માયા-મંડાણ રે,
બ્રહ્મમાં કછુ ભ્રાંતિ નહિ રે, અગમ ઘરની કરો ઓળખાણ... ખોજો રે૦
ઈંડ નહિ ને પિંડ નહિ રે, નહિ નિરંજન નાથ રે,
જ્યોતિ-સ્વરૂપ તે તો નહિ રે, તમે ખોળી કાઢો સર્વે સાથ... ખોજો રે૦
મન નહિ ને પવન નહિ, નહિ વાણીનો વિસ્તાર રે,
ચંદ્ર-સૂરજ દોનું નહિ, ત્યાં કોણ જગત-કિરતાર?... ખોજો રે૦
આયે નહિ ને ગયે નહિ – નહિ ધરે તે અવતાર રે,
દશ અવતાર જ્યાં હૈ નહિ રે, કોણ કરે માયા-વિસ્તાર?... ખોજો રે૦
જેની દૃષ્ટિથી આ સૃષ્ટિ બની, જે સૃષ્ટિનો સરદાર રે,
‘અંબારામ’ ઈચ્છા ઉન તણી રે, મારે તેનો છે એક આધાર... ખોજો રે૦
સ્રોત
- પુસ્તક : પરિચિત પદસંગ્ર (પૃષ્ઠ ક્રમાંક 37)
- પ્રકાશક : સસ્તું સાહિત્યવર્ધક કાર્યાલય, અમદાવાદ
- વર્ષ : 1946
- આવૃત્તિ : 3